یه‌كێتیی تۆپى پێى عێراق ئه‌مرۆ پێنجشه‌ممه به شێوه‌یه‌كى ره‌سمى راهێنه‌رى هه‌ڵبژارده‌ى نیشتمانى بۆ دوو یارى داهاتووى هه‌ڵبژارده‌كه له پاڵاوتنه‌كانى جامى جیهانى ٢٠٢٢ ده‌ستنیشانكرد .
یه‌كێتییه‌كه ئه‌ركه‌كه‌ى به‌خشیوه‌ته ، عه‌بدول غه‌نى شه‌هد كه یه‌كێكه له ناسراوترین راهێنه‌ره‌كانى ناوخۆى عێراق و پێش پێدانى ئه‌م ئه‌ركه راهێنه‌رى یانه‌ى نه‌فتى وه‌سه‌ت بوو .
دیار نییه شه‌هد پاش ئه‌و دوو یارییه گرێبه‌سته‌كه‌ى درێژ ده‌كاته‌وه یاخود راهێنه‌رێكى دیكه ده‌خرێته شوێنى به‌ڵام راسته‌وخۆ ئه‌و راهێنه‌ره ده‌ست له نه‌فتى وه‌سه‌ت هه‌ڵده‌گرێت .
ئه‌مه جارى دووه‌مه شه‌هد ده‌بێته راهێنه‌رى هه‌ڵبژارده‌ى نیشتیمانى پاش ئه‌وه‌ى ساڵى ٢٠١٨ به شێوه‌یه‌كى كاتى بووه راهێنه‌رى هه‌ڵبژارده‌كه ، پێشتریش به دیاریكراوى له ئۆلۆمپیادى ریۆى ٢٠١٦ راهێنه‌رى هه‌ڵبژارده‌ى ئۆلۆمپی عیراق بووه و هاوكات راهێنه‌رى هه‌ڵبژارده‌ى لاوان بووه ، سالێك پێش ئه‌و واده‌یه‌ش بۆ یه‌كه‌مجار له مێژوودا خولى نایابى تۆپى پێى عێراقى بۆ یانه‌ى نه‌فتى وه‌سه‌ت برده‌وه .
شه‌هد خاوه‌نى بروانامه‌ى پرۆى ئاسیاییه كه به‌رزترین بروانامه‌ى مه‌شقدانه ، له ژیانى راهێنه‌ریش ئه‌ركى مه‌شقدانى یانه‌كانى نه‌جه‌ف و كه‌ربه‌لاو ته‌ڵه‌به‌و شورته‌ى وه‌رگرتووه‌و یاریزانى پێشووتری هه‌ڵبژارده‌ى عێراق بووه .