هه‌رێز جه‌مال
ماوه‌یه‌كه به چڕى دۆسیه‌ى سكانداڵى سێكسى و كارى به‌د ره‌وشت له نێو وه‌رزش بۆته بابه‌تى گه‌رمى نێو میدیاو شه‌قامى وه‌رزشى، ئێسته بۆنى شه‌قامى وه‌رزشى وه‌ك رابردوو نییه به بڵاوكردنه‌وه‌ى راپۆرتێك و باس كردن له دیارده‌یه‌كى قێزه‌ون له‌و كایه‌ى ژیانى مرۆڤ له كوردستاندا خه‌ریكه ئاراسته‌كه‌و بیركردنه‌وه‌كه ده‌گۆڕێت .
زۆر دوور ناڕۆم قسه‌كردنم له‌سه‌ر ئه‌و سكانداڵه‌یه كه پێى ده‌وترێت لاقه‌كردنى وه‌رزشكارو ده‌ستبردن بۆ كارى نه‌شیاو ، ئه‌وه‌تا دیداری یاریزانێكى پێشوو كه ته‌نیا وتى چه‌ند جارێك لاقه‌كراوم دۆسیه‌ى چه‌ندینترى به‌خۆیدا راكێشاو تا كارگه‌یشته ئه‌وه‌ى فێرگه وه‌رزشیه‌كان ببه‌نه قوربانى یه‌كه‌مى ئه‌و دیارده قێزونه .
به حوكمى ئه‌و تێكه‌ڵه‌یه‌ى وه‌رزش هه‌مه هه‌ر له منداڵیه‌وه‌و دواتر قاڵبوونه‌وه‌م له كایه‌ى رۆژنامه‌وانى وه‌رزشى، هه‌ر زوو بۆم ده‌ركه‌وتووه ئه‌م دیارده‌ى باسى لێوه ده‌كرێت زاده‌یه‌كى كۆنى هه‌یه ، ئاخر چى من كه به راستیه‌وه بیستوومه ، ئه‌وانه‌شى كه به ته‌مه‌نن له وه‌رزش ده‌زانن ئه‌و بابه‌ته له شه‌سته‌كانى سه‌ده‌ى رابردوو وه تاوه‌كو ئێسته‌ش هه‌یه‌و زۆرێكیش له‌وانه‌ى كه وه‌رزشكارن نكوڵى لێ ناكه‌ن .
به‌دڵناییه‌وه ئه‌وانه‌ى ئێستا زۆر نزیكن له وه‌رزشه‌وه ئه‌و نووسینه‌ى من ده‌خوێننه‌وه چاك ده‌زانن كێ له ئالوده‌بووه‌كانى ده‌ستبردنه بۆ منداڵى بێ تاوانن ، كێن ئه‌وانه‌ى ته‌نیا بۆ سه‌رنجى به‌ژن و باڵاو له‌ش و لارى كچه وه‌رزشكاره‌كان دێن ، ئاخر من یه‌قینم هه‌یه یه‌ك و دووان بن ، هه‌مووان ده‌بێت ئه‌وه‌ش باش بزانین كه له زۆرێك له یانه وه‌رزشیه‌كان و ناوه‌نده‌كانى ئه‌و كایه‌یه كه‌سانى زۆر باش و رێك و پێك هه‌یه ، به‌ڵام به‌جۆرێك ئێسته خه‌ریكه پرسه‌كه تێكه‌ڵ ده‌بێت ره‌ش و سپى پێكه‌وه سووتاوه ، ره‌نگ بێت ئه‌وه‌ى له بیرى مندایه‌و ئه‌وه‌ى له‌به‌رده‌ستى منه زۆرررر له‌وه كه‌متر بێت كه ئێسته شه‌قامى وه‌رزشى هه‌ژاندووه ، ده‌یان ڤیدیۆى تۆماركراو هه‌یه كه له‌جه‌سته‌ى منداڵى بێتاوان تۆماركراوه ، ئه‌وه‌ش بۆ شارێكى دیاریكراو نییه به‌ڵكو پرسه‌كه زۆر شارو قه‌زاو ناحیه‌كانى گرتۆته‌وه .
من هه‌ڵه‌ى زۆرێك له كارگێریه‌كان و راهێنه‌ره‌كان نابینم ئه‌گه‌ر دوو هێنده له هه‌ندێك یاریزان نه‌بێت كه به‌بیانووى وه‌رزشه‌وه ده‌یانه‌وێت ناوى وه‌رزش له‌كه‌دار بكه‌ن ، به‌لێ كاره‌ساته‌كه زۆر گه‌وره‌تره چیتر نابێت وه‌رزشكاران كه خۆیان به پاك ده‌زانن خۆیان قڕوقه‌پ بكه‌ن ، ئاخر ده‌یان راهێنه‌ر هه‌یه نێوانى زۆر ناره‌وشتى له‌گه‌ڵ یاریزان هه‌یه ، تكایه با ئه‌و پرسه لێره زیاتر ته‌شه‌نه‌سه‌نێت ، تكایه یانه‌كان ئه‌ستۆ پاكى خۆتان له كۆمه‌ڵێك كه‌سان داماڵن كه گومانتان له كردارو گوفتاریان هه‌یه تا زووه رایان ماڵن ، سوێند به‌خوا هه‌مووتان له من باشتر ده‌زانن كێ و كێ و چى و چى نین ، تكایه با بۆ ئه‌م پرسه داواكارى گشتى و لایه‌نى په‌یوه‌ندیدار به چڕى بێته سه‌ر خه‌ت ناكرێت به‌هۆى دوو هه‌وه‌سبازه‌وه كایه‌و ناوى وه‌رزشى ناشرین بكرێت ، ئه‌گه‌ر تیرى گومانه‌كانیش وه‌ك ده‌ڵێت به ئه‌نقه‌ست له سلێمانى بێت ئه‌وا دڵنیابن ئه‌و دیارده قێزونه له شاره گه‌وره‌كانى تریش هه‌یه ، بۆیه تكایه به هیچ شێوه‌یه‌ك مه‌هێڵن ناوى شاره‌كه پیس بكرێت .
ئه‌وه‌ى روویداوه‌و هه‌ڵدانه‌وه‌و ئاشكرابوونى ئه‌و سكانداڵه ده‌روازه‌یه‌كى گه‌وره‌یه بۆ رێككردنه‌وه‌و به خۆداچوونه‌وه‌یه‌ك بۆ زۆر كه‌س و لایه‌ن دڵنیابن ئه‌گه‌ر بێت و هه‌ر ئاوا بڕوا ئه‌وا دڵنیابن ده‌یان دۆسیه‌ى تر ده‌بێت كه ئاقیبه‌تێكى خێرى نابێت .
