وه‌ك ته‌نیا كورد ماوه‌ى چه‌ندین ساڵه سه‌روكارى له‌گه‌ڵ یارى مۆتۆڕسكیلى جیهانى هه‌یه‌و سه‌ربارى ئه‌وه‌ى وه‌ك ناوبژیوانێكى نێوده‌وڵه‌تى ئه‌و یارییه به‌ناوبانگه‌یه،له كۆنگرێسى ساڵانه‌ى یه‌كێتییه‌كه‌ش ده‌بێته ناوێكى دیارو كاندیدى پۆستێكى گه‌وره‌ى یه‌كێتیی مۆتۆرسكیلى جیهانى ده‌بێت.
دكتۆر مه‌جید خیدایه‌خش مامۆستاى كۆلیجى وه‌رزش له زانكۆى سلێمانى و سه‌رۆكى ئه‌كادیمیاى سلێمانى بۆ مۆتۆڕسكیل و ئۆتۆمبیل له هه‌فته‌كانى رابردوو له شارى ریمیه‌ى وڵاتى ئیتاڵیا به‌شدارى له كۆبوونه‌وه‌ى ده‌سته‌ى گشتى یه‌كێتیی مۆتۆرسكیلى جیهانى كرد كه به FIMناسراوه، به‌و پێیه‌ى ناوبراو وه‌ك ناوبژیوانى نێوده‌وڵه‌تى ئه‌و یارییه‌و هاوكات نوێنه‌رى یانه‌ى عێراق بۆ مۆتۆرسكیل و وڵاتى عێراق میواندارو به‌شدارى ئه‌و كۆنگرێسه گه‌وره‌ى بوو.
سه‌باره‌ت به‌و كۆنگرێسه‌و چۆنێتى به‌شداریكردنى، دكتۆر مه‌جید له لێدوانێكى تایبه‌ت رایگه‌یاند، كۆبوونه‌وه‌كه بۆ ده‌ستنیشانكردنى سه‌رۆك و جێگرانى یه‌كێتییه‌كه بوو بۆ سێ ساڵى داهاتوو، له‌وێ سه‌رۆكى یه‌كێتییه به شێوه‌ى دانانه‌وه‌و به سه‌پۆرتى چه‌ندین وڵاتى ئه‌ندام داندرایه‌وه، دواتر هه‌ڵبژاردن بۆ سێ جێگرى یه‌كێتییه‌كه كراو به‌نده له‌وێ خۆم كاندید كرد بۆ یه‌كێك له‌و سێ پۆسته كه ئه‌مه ئه‌زموونى یه‌كه‌مم بوو، له‌و چواركه‌سه‌ى كاندید بووین من 26 ده‌نگى ئه‌ندامانم به‌ده‌ستهێناو ته‌نیا 10 ده‌نگ له سێیه‌مه‌كه‌وه دوور بووم، كه به بۆچوونى زۆربه‌ى ئه‌وانه‌ى له‌وێ بوون ئه‌وه ئه‌نجامێكى گه‌وره بووه بۆ من به‌و پێیه‌ى عێراق نوێیه له یه‌كێتییه‌كه‌و هه‌روه‌ها وه‌ك وڵاتانى تر نه‌یتوانووه سه‌پۆرتى به‌رده‌وامى هه‌بێت.
وتیشى ، من هه‌ر له‌و كۆنگرێسه قسه‌ى خۆم كرد سه‌باره‌ت به عێراق و كوردستان و تێڕوانێكى باشم به ئه‌ندامان و یه‌كێتییه‌كه‌ش داو له نزیكه‌وه چاوم به سه‌رۆك و جێگرى یه‌كێتییه‌كه‌ش كه‌وت و له‌وێش ده‌ستخۆشییه‌كى زۆرم لێكرا بۆ ئه‌و رێژه‌ى ده‌نگه‌ى هێناومه.
سه‌باره‌ت به ئاستى ئه‌و یارییه له كوردستان، دكتۆر مه‌جید وتى ” من سه‌رۆكى ئه‌كادییمیاى سلێمانیم بۆ ماتۆرسكیل و ئۆتۆمبیل به‌ڵام به‌داخه‌وه تاوه‌كو ئێستا له كوردستان و شارى سلێمانى زه‌وییه‌كى ته‌رخانكراومان بۆ ئه‌و یارییه نییه هه‌رچه‌نده چه‌ندین هه‌وڵم داوه بۆ لایه‌نى په‌یوه‌ندیدار به‌ڵام وه‌ڵاممان ده‌ست نه‌كه‌وتووه”.
وتیشى له پارێزگاى واست ئێستا شوێنێكى گه‌وره‌و فراوان بۆ ئه‌و یارییه هه‌یه‌و رۆژ به رۆژیش هه‌وادارى ئه‌و یارییه روو له هه‌ڵكشانه.
دكتۆر مه‌جید كه ناوبژیوانى نێوده‌وڵه‌تیشه ئه‌و پێشتر به‌شدارى به‌رێوه‌بردنى یارییه‌كه‌ى له ئۆستورالیاو توركیاو یۆنان كردووه‌و باوه‌ڕپێكراوى یه‌كێتیی مۆتۆرسكیلى جیهانیه بۆ به‌رێوه‌بردنى ئه‌و پاڵه‌وانێتییانه له لایه‌ن یه‌كێتیی جیهانیه‌وه له عێراق و كوردستان.
یه‌كێتیی مۆتۆڕسکیلى جیهان لە ساڵی 1904 دامەزراوە و بنکەکەی لە بەریتانیا بووە و ، دواتر بارەگا سەرەکییەکەی گواستراوه‌ته‌وه بۆ سویسرا.
هه‌رچى یانەی ئۆتۆمبێل و مۆتۆڕسکیلی عێراق لە ساڵی 2019 دامەزراوە و لە ساڵی 2020 بووەتە ئەندامی نێودەوڵەتی.
هه‌رێز جه‌مال
