ئه‌مڕۆ شه‌ممه 24/10/2020 به ئاماده‌بوونى سه‌رۆك و جێگر و سه‌رجه‌م ئه‌ندامه‌كانى، یه‌كێتى تۆپی پێی كوردستان كۆبوونه‌وه‌ى ئاسایی خۆى ئه‌نجامدا و، ئه‌م بڕیار و راسپاردانه‌ى خواره‌وه‌ى ده‌ركرد:
1- رۆژى شه‌ممه‌ى رابردوو 17/10/2020 یه‌كێتى تۆپی پێی كوردستان كۆبوونه‌وه‌ى هونه‌رى و تیروپشكى خولى یانه پله‌نایابه‌كانى كوردستان به ئاماده‌بوونى نوێنه‌رانى یانه‌كان ئه‌نجامدا، دواى گفتوگۆیه‌كى زۆر ئه‌م بڕیارانه درا:
* له‌سه‌ر داواكارى زۆربه‌ى یانه‌كان بڕیاردرا خوله‌كه به شێوازى دوو گرووپ ئه‌نجام بدرێت.
* خوله‌كه به به‌شدارى (16) یانه، كه دابه‌شكراون به‌سه‌ر دوو گرووپدا به شێوازى خول به دوو قۆناغ به‌رێوه ده‌چێت و یارییه‌كانى گه‌ڕى یه‌كه‌مى خوله‌كه‌یش، له رۆژى پێنجشه‌ممه 26/11/2020 ئه‌نجام ده‌درێت.
* گرووپى یه‌كه‌م پێكهاتوون له‌م یانانه: (برایه‌تى، هه‌ولێر، شێروانه، سۆران، سیروانى نوێ، چه‌مچه‌ماڵ، هه‌ڵۆ و زێره‌ڤانى).
* گرووپى دووه‌م پێكهاتوون له‌م یانانه: (ده‌ربه‌ندیخان، هه‌ندرێن، زاخۆ، نه‌ورۆز، پێشمه‌رگه‌ى سلێمانى، ئارارات، دهۆك و پێشمه‌رگه‌ى هه‌ولێر).
* له هه‌ر گرووپێك سێ یانه بۆ قۆناغى كۆتایی سه‌رده‌كه‌وێت واته شه‌ش یانه ده‌چێته قۆناغى كۆتایی، دواتر به شێوازى خول به دوو قۆناغ یارییه‌كان ئه‌نجام ده‌درێت و پاڵه‌وان دیارى ده‌كرێت.
* له هه‌ر گرووپێك دوو یانه بۆ ریزى یانه پله‌یه‌كه‌كانى كوردستان داده‌به‌زێت.
* هه‌ر یانه‌یه‌ك بۆى هه‌یه سێ یاریزانى پیشه‌گه‌رى هه‌بێت، به‌ڵام له یه‌ك كاتدا ته‌نیا دوو یاریزان ده‌توانن له نێو یاریگه‌دا یارى بكه‌ن.
* پێنج گۆڕانكارى له یه‌ك یارى ئه‌نجام ده‌درێت، به مه‌رجێك به سێ جار گۆڕانكارییه‌كان بكرێت.
2- له‌سه‌ر پێشنیارى سه‌رۆكى یانه‌ى هه‌ڵۆ (ئه‌حمه‌د خه‌لیل) سه‌باره‌ت به یارى كۆتایی خولى پله‌یه‌كى كوردستان بۆ وه‌رزى 2019/2020، كه به هۆى په‌تاى كۆڕۆنا یارییه‌كه تا ئێسته ئه‌نجام نه‌درا بوو، یانه‌ى چه‌مچه‌ماڵ وه‌ك پاڵه‌وانى خوله‌كه ده‌ستنیشانكرا، بێ ئه‌وه‌ى یارییه‌كه ئه‌نجام بدرێت، ئه‌م بڕیارانه‌یش دران:
* یانه چه‌مچه‌ماڵ پله‌ى یه‌كه‌م و یانه‌ى هه‌ڵۆ پله‌ى دووه‌مى خولى یانه پله‌یه‌كه‌كانى كوردستانن بۆ وه‌رزى 2019/2020.
* سوپاسى سه‌رۆكى یانه‌ى هه‌ڵۆ ده‌كه‌ین بۆ ئه‌م پێشنیاره گونجاو و دروسته، كه لە لایه‌ن یه‌كێتى تۆپی پێی كوردستان به‌گیانێكى به‌رزى وه‌رزشى وه‌رگیرا.
* ئه‌گه‌ر خه‌ڵاتى ماددى دابینكرا، ئه‌وا به یه‌كسانى به‌سه‌ر هه‌ردوو یانه دابه‌ش ده‌كرێت.
* له كاتێكى گونجاو مه‌ڕاسیمێكى شایسته بۆ هه‌ردوو یانه رێكده‌خرێت.
* پیرۆزباییه‌كى گه‌رم له هه‌ردوو یانه‌ى (چه‌مچه‌ماڵ و هه‌ڵۆ) ده‌كه‌ین، هیواى سه‌ركه‌وتنى زیاتر و به‌رده‌وامیان بۆ ده‌خوازین، له‌گه‌ڵ سوپاس و پێزانینمان بۆ سه‌رجه‌م به‌شداربووانى خوله‌كه و جه‌ماوه‌رى وه‌رزشى ده‌سته‌ى كارگێرى یانه‌كان و ستافى هونه‌رى و یاریزانان و راگه‌یاندنكارانى خۆشه‌ویست.
3- یه‌ك یاریزانى ده‌ره‌وه‌ى هه‌رێمى كوردستان ده‌توانن یارى بۆ تیپه‌كانى تازه‌پێگه‌یشتووان و لاوان بكه‌ن، به مه‌رجێك یاریزانه‌كه دانیشتووى شوێنى جوگرافى هه‌مان یانه بێت، كه یارى بۆ ده‌كات.
4- یاریزانانى هه‌رێمى كوردستان ده‌توانن بۆ هه‌ر یانه‌یه‌ك له تیپه‌كانى تازه‌پێگه‌یشتووان و لاوان یارى بكه‌ن، به مه‌رجێك ته‌مه‌نى رێگه‌پێدراو بێت.
5- سه‌رجه‌م یاریزانانى خوله‌كانى تۆپی پێی كوردستان بۆ وه‌رزى 2021/2022 ئازاد ده‌بن دواى كۆتایی هاتنى چالاكییه‌كانى وه‌رزى 2020/2021.
6- راهێنه‌ران و یاریده‌ده‌رانى راهێنه‌رى كوردستان، ئه‌گه‌ر بڕوانامه‌ى باوه‌ڕپێكراوى یه‌كێتى تۆپی پێی كوردستان و بڕوانامه‌كانى (A-B-C) ـیان نه‌بێت، مافى راهێنه‌رایه‌تیان نابێت.
7- سه‌رجه‌م راهێنه‌رانى چالاكییه‌كانى یه‌كێتى تۆپی پێی كوردستان تا رێكه‌وتى 31/12/2019 بڕوانامه‌كانیان كارى پێده‌كرێت.
8- ستافى هونه‌رى یانه‌كانى كوردستان ته‌نیا ده‌توانن له‌گه‌ڵ یه‌ك تیپ له یانه‌كانیان كار بكه‌ن.
9- ده‌سته‌ى كارگێرى یانه‌كان بۆیان نییه كارى راهێنه‌رایه‌تى له یانه‌كان بكه‌ن، تاكو ده‌ستبه‌ردارى ئه‌ندامیه‌تى نه‌بێت له یانه‌كه‌ى.
10- كچه‌یاریزانانى فوتساڵى كوردستان ناتوانن یارى بۆ تیپه‌كانى یازده یاریزانى له یاریگه‌ى گه‌وره و كراوه ئه‌نجام بده‌ن.
11- داوا له سه‌رجه‌م ئه‌و یانانه ده‌كه‌ین، كه ئاره‌زووى به‌شدارییكردنیان له خولى پله‌یه‌كى فوتساڵى كچانى كوردستان هه‌یه، به نووسراوى فه‌رمى ئاگادارمان بكه‌نه‌وه تا كۆتایی هه‌فته‌ى داهاتوو.
12- رێكه‌وتى 17 و 18 ـى مانگى 11 ـى 2020 تاقیكردنه‌وه‌ى تیۆرى و جه‌سته‌یی بۆ ناوبژیوانانى كوردستان ئه‌نجام ده‌درێت، به مه‌رجێك ناوبژیوانه‌كه ئه‌نجامى پشكنینى نێگه‌تیڤى په‌تاى كۆڕۆناى هه‌بێت.
13- رێكه‌وتى 8/11/2020 تاقیكردنه‌وه‌ى تیۆرى و جه‌سته‌یی بۆ ناوبژیوانانى فوتساڵى كوردستان ئه‌نجام ده‌درێت، به مه‌رجێك ناوبژیوانه‌كه ئه‌نجامى پشكنینى نێگه‌تیڤى په‌تاى كۆڕۆناى هه‌بێت.
14- دواین كات بۆ پێشكه‌شكردنى لیستى ناوى یاریزانان (كشوفات) بۆ تیپه جیاوازه‌كان به‌مشێوه‌یه‌ى خواره‌وه ده‌بێت:
* خولى نایابى كوردستان 5/11/2020
* خولى نایابى تازه‌پێگه‌یشتووان 5/11/2020
* خولى پله‌یه‌كى كوردستان 8/11/2020
15- پێنج یاریزانى تیپى لاوان ده‌توانن یارى بۆ تیپى پێشكه‌وتووان له خولى نایاب و پله‌یه‌كى كوردستان بكه‌ن، ده‌شتوانن بۆ خولى لاوانى بگه‌رێنه‌وه، به‌ڵام ناتوانن دووباره بگه‌ڕێنه‌وه خولى پێشكه‌وتووان.
16- رۆژى شه‌ممه 31/10/2020 كۆبوونه‌وه‌ى هونه‌رى و تیروپشكى خولى پله‌یه‌كى كوردستان ئه‌نجام ده‌درێت، بۆیه داوا له نوێنه‌رانى ئه‌م یانانه (شه‌قڵاوه، ئاسۆ، سه‌یدسادق، خاك، ئاڵتون كۆپرى، رزگارى، ئاشتى، كۆیه، هه‌ڵه‌بجه‌ى شه‌هید و ئاكرێ) ده‌كه‌ین، له كاتژمێر 11:00 ـى به‌یانى له باره‌گه‌ى یه‌كێتى تۆپی پێی كوردستان ئاماده‌بن.
17- سه‌رجه‌م لێژنه‌كانى یه‌كێتى تۆپی پێی كوردستان به لێژنه‌ى فێرگه‌كانیشه‌وه هه‌ڵوه‌شایه‌وه، هیچ كه‌سێك بۆى نییه به ناوى یه‌كێتییه‌كه‌مان خول و چالاكى بكاته‌وه و ته‌نیا به ره‌زامه‌ندى و بڕیارى یه‌كێتى تۆپی پێی كوردستان نه‌بێت.
