نه‌ورۆزى سلێمانى ، شانازییه‌كى ئه‌به‌دییانه
خه‌ونى سه‌دان یانه‌ى گه‌وره‌یه ناویان له‌و خوله بشه‌كێته‌وه
هه‌رێز جه‌مال
نه‌ورۆزى سلێمانى كه‌ى یارى هه‌یه ؟ نه‌ورۆز له پله‌ى چه‌نده‌مه ؟ نه‌ورۆز كێى هێناوه ؟ یارى داهاتووى له‌گه‌ڵ كه‌یه ؟ ره‌نگه ئه‌مه زۆرترین پرسیارى دووباره‌ى وه‌رزشى ئێستاى كوردستان و عێراقیش بێت له ناو شه‌قامى وه‌رزشى له باكوورى كوردستان تاوه‌كو باشوور ئه‌و ناوه نوێیه‌ى كه یه‌كه‌م وه‌رزه له خولێكى گه‌وره‌ى عێراق به‌شدار بێت كه خولى نایابى عێراقه‌و خه‌ونى سه‌دان یانه‌ى گه‌وره‌یه ناویان له‌و خوله بشه‌كێته‌وه .
دوور ناڕۆم پلانى نه‌ورۆز بۆ یاریكردن له ساحه‌ى عێراق زۆر دوور مه‌ودا نییه ، به‌ڵام خه‌ونێك بوو سوپاس بۆ خوا به هێمنى له‌دایكبوو به‌ڵام به زووى گه‌وره‌بوو ، ئێستا ناوى ئه‌و یانه كوردانه‌یه ركابه‌رى ئه‌و یانانه ده‌كات كه نزیك ده‌بنه‌وه له چاره‌كه سه‌ده‌یه‌ك .
نه‌ورۆز هه‌ر له هه‌نگاوى یه‌كه‌میه‌وه ره‌نگه ئه‌وه بۆ بینه به‌جێبێڵم وردو درشت ئاگادارى ئه‌نجام و هه‌وڵ و پلانه‌كانیان بووبم بۆ گه‌یشتن به‌م رۆژه ، هه‌ر ده‌ست له دڵ بووین له پاڵاوتنه‌كان و تاوه‌كو گه‌یشته قۆناغێك به‌رزترو دواتر خۆى گه‌یانده پله‌یه‌ك و له‌وێش بووه ئه‌سپى ره‌ش و ژماره‌یه‌ك قورس له وه‌رزى رابردوو به جۆرێك یانه هه‌بووه ده‌یان هێنده‌و بیست هێنده‌ى نه‌ورۆزى سه‌رفكردووه بۆ تیپه‌كه‌ى ته‌نیا بگاته نایاب به‌ڵام نه‌گه‌یشت .
نه‌ورۆزو ستافى به‌رێوه‌بردنه‌كه‌ى دوو وه‌رزه ده‌سته‌به‌ردارى هه‌موو خۆشیه‌كى خودى بوون ته‌نیاو ته‌نیا له پێناو تیپه‌كه‌یان و ناوى شاره‌كه‌و كوردستان ، ئێسته ئه‌و مه‌رامه سوپاس بۆ خوا هه‌نگاوى گه‌وره‌ى ناوه ، نه‌ورۆز له نیوه‌ى ریزبه‌ندى به‌ولایه‌وه بۆ تیپێك كه یه‌كه‌م وه‌رزێتى له خولێكى وه‌ها گه‌وره كه پێم وابێت تیپ هه‌یه ده‌یان ملیارو سه‌دان پاڵشتى سه‌رف ده‌كات ته‌نیا بۆ ئه‌وه‌ى ركابه‌ر بێت، بۆ نه‌ورۆزى كوردان گه‌وره‌ییه .
ئه‌ڵبه‌ت ناگه‌ڕێمه‌وه بۆ شه‌ش مانگ له‌مه‌وبه‌ر كه دۆخێكى نه‌خوازراو هاته رێ، كه بێگومان هه‌ڵكه‌وته‌ى سروشتى سلێمانى و دۆخه‌كه‌ش ئه‌و تیپه‌و یانه‌كه‌ى خسته حاڵه‌تێكه‌وه كه چوونه ژێر بارى له مه‌حاڵ مه‌حاڵتر بوو ، به‌ڵام به هیمه‌تى خه‌مخۆرانى راسته‌قینه‌ى سه‌رۆكایه‌تى یانه‌كه‌و یه‌ك ده‌ستى جێگرو ده‌سته‌ى كارگێرى دووباره نه‌ورۆز ، گه‌ڕایه‌وه كه‌نارى ئارامى ، زۆر هه‌بوون شاگه‌شه بوون بۆ ئه‌وه‌ى ئه‌و ناوه نه‌مێنێ یان به‌شدارى خوله‌كه نه‌كات به‌ڵام خه‌ونه‌كه‌یان وه‌ك هه‌ڵمى كترى به باچوو .
من له روانگه‌ى ته‌نیا به‌شداریكردنى تیپێكه‌وه ناروانمه وه‌رزش ، من ده‌یان حاڵه‌تى باشى ئه‌و نوێنه‌ره تاقانه‌یه‌كه ده‌بینم له خوله‌كه ، هه‌فته نییه یانه‌یه‌ك نه‌یه شاره حه‌یاته‌كه ئه‌مه‌ش من ده‌زانم جوڵه‌یه‌كى باشى بزنسى بۆ شاره‌كه ، چونكه هه‌ر شاندێك دێت جارى وایه سه‌رو ٣٠ كه‌سه‌و جار هه‌یه ئه‌وانه سێ رۆژ میوانن له خۆت ده‌پرسم ، ئه‌م جوڵه وه‌رزشیه -بزنسیه گه‌وره نییه كه چه‌ندین ساڵه ئێمه به خه‌ونیش نه‌مان دیووه .
لێتان ناشارمه‌وه ئه‌وه‌ى هێزى خۆشه‌ویستى وه‌رزشم پێده‌دات له‌م جه‌نجاڵیه‌ى ئێسته ئه‌و تیپه‌یه ، ده‌مه‌وێت هه‌مووان پشتگیرى بكه‌ن ، پاڵپشتى بكه‌ن ، من خۆم به ئاسووده ده‌زانم له هه‌موو پلاتفۆرمه میدیایه‌كانم هاندانم بۆ ئه‌و یانه‌یه هه‌یه ، من گه‌یشبینم به‌وه‌ى نه‌ورۆز ئێسته موڵكى كه‌س نییه به‌ڵكو بۆته موڵكى هه‌مووان ، شاگه‌شكه‌م خه‌ڵك له به‌سره‌وه سه‌یرى نه‌ورۆز ده‌كات ، خۆشبه‌حاڵم به‌رپرسانى شورته ده‌ڵێن زه‌حمه‌ترین یارییمان تا ئێسته به‌رامبه‌ر نه‌ورۆز بووه ، وه‌ڵاهى له دڵه‌وه فرمێسكى شادى ده‌ڕژم كه میدیا عه‌ره‌بیه‌كان ده‌لێن ، شارى سلێمانى شارى رێزو شارى میواندۆستیه‌و هیوادارین شاره‌كانى تر وه‌ك یانه‌ى نه‌ورۆز و ئه‌و شاره بن .
ده‌ى ئیدى كاتى هاتووه رۆژى یارییه‌كانى نه‌ورۆز شار پڕ بكه‌ین له بۆن و به‌رامه‌ى نێرگزى ئه‌و یانه‌یه، هه‌مووان به پیرو لاوو گه‌نج و سیاسیه‌كان دوور له بۆچوونیان بێن چه‌پڵه بۆ ئه‌و یانه جوانه‌و تیپه سپۆرته‌ى كوردان لێبده‌ن ، لاى من نه‌ورۆزى ئه‌مساڵ نه‌ورۆزێكى جیاوازه، نه‌ورۆزى من نه‌ورۆزى گوڵ و نێرگز نییه‌و نه‌ورۆزى كوڕانى شاره‌حه‌یاته‌كه‌یه .
