د.عیماد سه‌دره‌دین
زانكۆ ده‌زگایه‌كى زانستى ومه‌عریفى یه،ئه‌ركى زانكۆ ئه‌وه‌یه كۆمه‌لێك كه‌سانى ئه‌كادیمی به‌رهه‌م بهێنێت،ئه‌م ئه‌كادیمیایانه‌ش ئه‌ركێكی گرنگ له دواڕۆژدا ده‌كه‌وێته ئه‌ستۆیان به‌جۆرێك له‌كاتى گفتوگۆكردن له‌گه‌ڵیان هه‌ندێ نمونه‌ى زیندووى گه‌وره به‌رجه‌سته ده‌كرێت بۆیه حكومه‌تی هه‌رێم پێویسته نمونه‌یه‌كی جوان بێت له‌به‌رده‌میان و قۆناغ به‌قۆناغ حكومه‌ت به‌رپرسیاره له لێپرسینه‌وه، بۆ پته‌وكردنى په‌یوه‌ندى نێوان ده‌رچووان وحكومه‌ت،به‌جۆرێك ناكرێت هه‌لی كاریان بۆ دابین نه‌كرێت.
وه‌رزشیش خۆی هونه‌ر و زانسته، هیچ مرۆڤێك بێ كۆشش و به‌دوادا چوون فێرى ئه‌م زانسته نابێت، ده‌رچووانی كۆلێژی په‌روه‌رده وه‌رزش كۆمه‌ڵێك كێشه‌یان هه‌یه كه‌كه‌مترین پانتایی بۆ ته‌رخان كراوه و كێشه‌كانیان له‌سنورێكى داخراودا ماوه‌ته‌وه، هه‌مووشمان ئه‌و ڕاستییه ده‌زانین كه دامه‌زراندن ته‌نها رێگایه تا ده‌رچووان داكۆكی له خۆی پێ بكات بۆ ئه‌وه‌ى بێته ناو ژیانی ئه‌كادیمی و كاركردن، به‌پێى ڕاپرسییه‌ك ته‌نها 13% -ی ده‌رچووان هه‌لی كاركردنیان بۆ ڕه‌خساوه له‌لایه‌ن ده‌زگا ناحكومیه‌كانه‌وه، بۆیه‌پێویسته حكومه‌تی هه‌رێم پله به‌ندیه‌كی هه‌بێت به‌جۆرێك پێوه‌رێكیان بۆ دابندرێت كه‌پشكی شێرى دامه‌زراندنیان بۆ بڕه‌خسێنێت، له‌گه‌ڵ بوونى سه‌دان شوێن بۆ كاركردن به‌ڵام هه‌زاران ده‌رچووی دانه‌مه‌زراو هه‌یه، بۆیه پێویسته ده‌زگا په‌یوه‌ندیداره‌كانی حكومه‌تی هه‌رێم و وه‌زاره‌تی خوێندنی باڵا و وه‌زاره‌تی په‌روه‌رده له‌كاتی پێدانی مووڵه‌ت به‌پڕۆژه‌كانی كه‌رتی تایبه‌ت له‌كاتی كردنه‌وه‌ی په‌یمانگاو زانكۆی تایبه‌ت و ده‌زگای راگه‌یاندن وهۆڵی وه‌رزشی وفێرگا وه‌رزشی و مه‌له‌وانگا،مه‌رجی دامه‌زراندنی ئه‌و ده‌رچووانه بسه‌پێنێت به سه‌ر ئه‌و شوێنانه‌دا چونكه كاتێك ده‌سه‌ڵات بڕیارده‌ر بێت، ئه‌وا كێشه‌كان باشتر بنبڕ ده‌كرێن.
هه‌رله‌چوارچێوه‌ى بابه‌ته‌كه‌مدا ئه‌مێنمه‌وه تا په‌نجه بخه‌مه سه‌ر خالێكی جه‌وهه‌ری بۆ زۆرینه‌ى ده‌رچووانى كۆلێژى په‌روه‌رده‌ى وه‌رزشی كه پسپۆرییه‌كه‌یان به‌هه‌ند وه‌ربگرن چونكه جگه له‌پیشه‌ی مامۆستایه‌تی ئه‌وان ده‌توانن له‌زۆر شوێندا هه‌لی كاریان ده‌ست بكه‌وێت له‌بواری كه‌رتى تایبه‌تدا، وه‌كو ڕاهێنه‌ر و ناوبژیوان و یاریزان و رزگاركه‌ر و بواری چاره‌سه‌ری سروشتی و میدیاكار و كۆمێنتكار و رۆژنامه‌نوسی وه‌رزشی هتد..كاربكه‌ن.
له‌كۆتایشدا به‌وجۆره‌ش ڕه‌شبین نیم و نایكه‌مه پێوه‌رێك تاتوشى چه‌واشه نه‌بین، ئه‌گه‌ر فریای ده‌رچووانمان بكه‌وین ئه‌وه رێگای ڕاست ده‌گرینه به‌ر ئه‌گه‌ر نا ئه‌وه پلانێك نییه بۆ چاره‌سه‌ركردن.
له هه‌فته‌نامه‌ى ستادیۆمه‌وه بڵاوكراوه‌ته‌وه
