یاسر قاسم بۆ خولى پله شه‌شى ئینگلته‌را
یانه‌ى ویلینگ یونایتدى ئینگلیزى به‌شدار له خولى پله شه‌شى یانه‌كانى ئینگلته‌را گواستنه‌وه‌ى یاسر قاسم، یاریزانى پێشووى هه‌ڵبژارده‌ى عیراق و یانه‌ى زاخۆى راگه‌یاند.
قاسم دوای ئیمزاكردنى گرێبه‌سته‌كه‌ى وتى ، هەستێکی خۆشە لێرەم، بۆ ئەوەی باش یاری بکەم و دەمەوێت ئەزموونەکەم بهێنمە ناو گۆڕەپانی مەشقەکان و بۆ ناو یاریگا.
یاریزانە تەمەن 31 ساڵەکە لە 21 بۆنەدا نوێنەرایەتی عیراقى کردووە، لە ئاستى لاوان لەگەڵ یانەی تۆتنهام هۆتسپێری خوار 18 ساڵ یاریكردووه پێش ئەوەی لە ساڵی 2010 پەیوەندی بە یانەی برایتۆن و هۆڤ ئەلبیۆنەوە بکات، دوای ئەوەی یەک یاریی لەگەڵ سیگاڵزدا ئەنجامداوە، بە خواستن رووى لە لوتۆن تاون و ماکلسفیڵد تاون كرد پێش ئەوەی لە ساڵی 2013 بۆ هەمیشە پەیوەندی بە یانەی سویندۆن تاونەوە بکات، دواتریش رووى له نۆڕپامپتۆن تاون لە ساڵی ٢٠١٧ كرد، پێش ئەوەی لە مانگی یەکی ٢٠١٩ لەگەڵ یانەی ئۆریبرۆ گه‌یشته رێككه‌وتن و پاشان چووه هه‌ولێرو زاخۆ له خولى عێراق.
یاریزانەکە دەڵێت: دەمەوێت کاریگەری ئەرێنی بم لە دەوری پێکهاتەکە،من یاریزانێکی بیرکەرەوەم، حەزم لێیە بچمە ناو یاریگا، کۆنتڕۆڵی یارییەکە بکەم، زاڵ بم بەسەریدا و لەگەڵ بردنەوەکەدا بگەڕێمەوە ماڵەوە”.
سپۆرت میدیا- دێسكى جیهانى
