سۆزیار یوسف
یاریزانێكی تازه‌پێگه‌یشتووی كورده، ئه‌و له سه‌نته‌ری پارێزگای شاره‌كان له دایك نه‌بووه به‌ڵكو خه‌ونی بۆ وه‌رزش و تۆپ وای لێكرد رۆژانه چه‌ندین كیلۆمه‌تر ببڕێت تا بگاته ناوه‌ندی شارو له‌وێ په‌ره به به‌هره‌كه‌ی بدات تاوه‌كو دوا جار وێستگه‌ی له هه‌ڵبژارده‌ی عیراق بوو ئه‌ویش یاریزانی كورد ( باوان ستار)ه.
باوان له ساڵی 2006 له گوندی بێستان سوور سه‌ر به ناحیه‌ی عه‌ربه‌تی سه‌ر به پارێزگای سلێمانی له دایكبووه ، ئه‌و سه‌ره‌تای سه‌رهه‌ڵدانی له تیپی وەرزشی بێستان سوور بووه‌و دواتر رووی له تیپی تازەپێگەشتوانی یانەی ئاشتی كردووه، باوان لەیەكەم وەرزی یاریكردنی له ئاشتی سەرنجی هەموانی بەلای خۆیدا ڕاكێشا ئه‌وه‌ش رێگه خۆشكه‌ربوو كه ڕاهێنەری هەڵبژاردەی تازەپێگەشتوانی عیراق بانگهێشتی ڕیزی هەڵبژاردەكه‌ی بكات و پاش چه‌ندین تاقیكاری له نێو سه‌دان یاریزان، باوان بووه یاریزانی هه‌ڵبژارده‌كه.
یه‌كه‌م ده‌ركه‌وتنی ره‌سمی ئه‌و یاریزانه كورده له‌پاڵه‌وانێتی وڵاتانی عه‌ره‌ب دابوو كه مانگی ئابی ئه‌مساڵ 2022 له‌وڵاتی جه‌زائیر ئه‌نجامدرا، له رۆژانی رابردووش له وڵاتی شانشینی عومان له‌گه‌ڵ هه‌ڵبژارده‌كه‌ی به‌شداریان له پاڵاوتنه‌كانی سه‌ركه‌وتن بۆ جامی ئاسیا كرد، ئه‌گه‌رچی باوان له یه‌ك یارییدا هه‌لی پێدرا سه‌ره‌كی بێت، به‌ڵام له‌و یارییه خۆی ده‌رخست و گۆڵێكی به‌رامبه‌ر به‌حره‌ین ،كرد گه‌رچی هه‌ڵبژارده‌كه‌شی نه‌یتوانی به‌ربه‌ستی پاڵاوتنه‌كان ببڕێت به‌ڵام كوڕه به‌هره‌مه‌نده‌كه‌ی بێستانسوور توانی له ده‌ستپێكی ته‌مه‌نی وه‌رزشكردنییه‌وه مێژوو بنووسێته‌وه
له كوردستانى نوێ وه، وه‌رگیراوه
