هه‌رێز جه‌مال
به قه‌ولى په‌رله‌مانى ئه‌مرۆ له یه‌كێتیی تۆپى پێى كوردستان له ناوجه‌رگه‌ى شارى هه‌ولێر نیسابى ئه‌ندامانى یه‌كێتییه‌كه ته‌واوكراو له رۆژێكى مێژووى پاش چاوه‌ڕوانى چوار مانگه له وه‌ستانى خوله‌كه و دڵه راوكێى یاریزانان و راهێنه‌ران و ته‌واوى هانده‌ران چاره‌نووسى خوله‌كه یه‌كلابوویه‌وه .
ئه‌وه‌ى سیحرى ئه‌م كۆبوونه‌وه‌ى به‌هێز كرد ئه‌و جوڵه هونه‌رییه بوو كه ئه‌ندامانى ده‌ڤه‌رى سه‌وز به براده‌رانى پارتى ركابه‌رییان كردوو وه‌ك ده‌ڵێت گه‌مه‌كه‌یان به خشكى لێبردنه‌وه‌و پاڵه‌وانیشیان یه‌كلاكرده‌وه‌و فاتیحه‌یان بۆ هه‌موو شتێك دایا .
پاش ئه‌وه‌ى خوله‌كه كۆتایهات و یانه‌ى نه‌ورۆزى شارى سلێمانى ( به‌هێزترین و پاڵێوراوترین )یانه‌ى ساڵ بۆ خوله‌كه به پێى كۆتا گه‌ڕى خوله‌كه له ریزبه‌ندى كرایه پاڵه‌وان ، ئیدى یارو نه‌یار لێیان هه‌ڵشاخاو ئه‌و بریاره‌یان پێ هه‌زم نه‌كرا ، كه بۆچوونم وایه ئه‌و هه‌زمنه‌كردنه‌ش چه‌ند سه‌عاتێكى تر ناخایه‌نێت و ئیتر دۆخه‌كه ئاسایى ده‌بێته‌وه ، چونكه ئه‌وه‌ى ده‌یبینم له خۆ نمایشكردنێك زیاتر هیچى تر نییه تاوه‌كو دوایى نه‌كه‌ونه به‌ر ڵێشاوى لێ پرسینه‌وه .
بێزه‌حمه‌ت سكرتێرى یه‌كێتیی تۆپى پێى كوردستان كه خۆى به فه‌یله‌سوفى یه‌كێتیی تۆپى پێى كوردستان ده‌زانێت ، بۆ ئه‌گه‌ر ده‌زانیت شكست دێنێت له كۆبوونه‌وه چویته كۆبوونه‌وه‌و نیسابت ته‌واو كرد ؟ خێره له ساڵانى رابردوو چه‌ندین نازناو به فێڵ و ته‌له‌كه براوه‌و ناوبژیوان كراوه‌ته‌وه‌و یانه‌كان یارییان به ئه‌نجامه‌كان كردووه وه‌ك ئه‌مرۆ خۆت مشه‌وه‌ش نه‌كردووه ؟ یانه هه‌بووه نازناوه‌كه‌ى بردووه به چه‌ندین یاریزانى پیشه‌گه‌رو عه‌ره‌به‌وه به گرێبه‌ستى خه‌یالى و پاره هه‌ڵرشتنه‌وه ، خێره هیچ هه‌ڵوێستێكتان نه‌بوو ؟
جارێ من له سحرى له‌وچه‌ى ئه‌و رۆژنامه‌نووسانه تێ ناگه‌م كه هیچیان به ده‌ست نییه‌و كه‌وچك له شت ده‌ده‌ن و بریار ده‌ده‌ن ، كاتێك بریاره‌كه دراوه جێگرى سه‌رۆك به پێى په‌یره‌و له برى سه‌رۆك ده‌سه‌ڵاته‌كانى به‌كارهێناوه ، خولی فەرەنسا ھەڵوەشایەوە کەس پرسیاری ئەوەی نەکرد کە کام یانە لەگەڵ کام یانە جیاوازی گۆڵی ھەیە، کە خولەکە وەستاوە ڕیزبەندییەکە بەو شێوەیە بوو بۆیه به هه‌موو پێوه‌رێك نه‌ورۆز پاڵه‌وانه .
راستییه‌كى تاڵه‌و ده‌بێت هه‌مووان ئه‌وه قبوڵ بكه‌ن ، ئه‌مه‌ى كرا گۆڵێكى ئاڵتونى بۆردى وه‌رزشى و جێگرى سه‌رۆكى یانه‌ى نه‌ورۆز بوو له وه‌رزشى كوردستان و په‌یامێكى ده‌ستپێك بوو كه چیتر ئه‌و سه‌رده‌مه نه‌ما یارى به ویژدان و كه‌رامه‌تى وه‌رزشكارو یانه‌كانى سنوورى سه‌وز بكرێت ، ئیتر كاتى ئه‌وه هاتووه هه‌ق بدرێته‌وه به خاوه‌ن ماف .
جێگه‌ى نه‌نگى و نیگه‌رانییه كه یانه‌كانى كوردستان و به تایبه‌تر یانه‌كانى ( سلێمانى ) كه به‌شێكیان ناویان له كوله‌كه‌ى ته‌ر نه‌ماوه ته‌قه‌بولى ئه‌و نازناوه نه‌كه‌ن كه یانه‌یه‌ك شكۆى بۆ شارێك گێرایه‌وه ، له برى ده‌ست خستنه ده‌ستى یه‌كتر و پاڵپشتى ، هه‌ر له رێگه‌وه كه‌وتنه به‌یاننامه‌ى به‌تاڵ و به زۆر نووسراو ، زۆرێك له یانه‌كان چه‌ندین مانگه سه‌نتێكیان نه‌داوه به یاریزانێك خوا خوایان بوو خوله‌كه هه‌ڵبوه‌شێته‌وه ئیتر قیژه قیژى چى ده‌كه‌ن .
بۆیه ئیتر پێویسته ئه‌م قاوو قیژه سیناریۆیانه رابگرن چى ئه‌ندامانى زه‌ردى یه‌كێتیی تۆپى پێى كوردستان كه دڵنیام دوا به‌یه‌كتان خوا خواتان بوو خوله‌كه ته‌وابێت یانه‌كانیش واز له‌و دوو روویه بهێنن به لێدوانى قۆرو بێمانا ته‌نیا بۆ چه‌واشه‌كردنى هانده‌رانه‌كانیان و خزمه‌تكاره‌كانیان چونكه ئه‌و پرسه كۆتایهاتووه‌و ده‌بێت ئێوه له برى رق و بوغزو كینه له یانه‌یه‌كى شارى سلێمانى ئێستا په‌یام له‌سه‌ر په‌یامى پیرۆزبایتان بناردایه .
